Müəllif:Ayşən İmanova/Banco.az
Brüssel və Pekin yaxın zamanda Çin elektromobillərinin Avropaya idxalı üzrə rüsumların ləğvi barədə razılığa gələ bilərlər.
Banco.az xəbər verir ki, bu barədə Avropa Parlamentinin beynəlxalq ticarət komitəsinin sədri Bernd Lange Almaniyanın NTV telekanalına bildirib.
“Biz Çinlə rüsumların ləğvi üçün razılığa yaxınıq: Çin Aİ-də elektromobilləri minimum qiymətdən aşağı təklif etməmək öhdəliyini götürə bilər. Bu, ədalətsiz subsidiyalar vasitəsilə rəqabətin təhrif olunması problemini aradan qaldıracaq ki, bu səbəbdən də əvvəlcə rüsumlar tətbiq edilmişdi”, – o vurğulayıb.
Parlamentari həmçinin Almaniyanın mümkün cavab tədbirləri ilə bağlı narahatlıqlarını bölüşmədiyini bildirib: nümunə olaraq o, Pekinin tətbiqinə etiraz etdiyi, lakin sonradan barışdığı Çin elektrobayklarına rüsumları göstərib.
Qeyd edək ki, son aylarda Aİ və Çin arasında mediada “ticarət müharibələri” adlandırılan bir neçə böyük ticarət mübahisəsi baş verib. Belə ki, oktyabrın 29-da Avropa İttifaqı ÇXR-dən elektromobil idxalına əlavə rüsumların tətbiqini yekun olaraq təsdiqləyib: istehsalçıdan asılı olaraq bu rüsumlar 35,3 %-ə qədər təşkil edəcək. Çin artıq ÜTT-də bu addıma etiraz edib. Eyni zamanda, Brüssel Pekinlə birlikdə alternativ həll yolunun axtarışlarını davam etdirəcəklərini bildirib.
