Müəllif: Gülnar Əhmədli, Banco.az
Əgər şokoladı sevirsinizsə, demək ki, bu ləzzətli qidanın sağlamlığınız üçün faydalı və ya zərərli olduğuna dair ən azı 1 dəfə də olsa düşünmüsünüz. Şokolad dedikdə ağlımıza üç əsas növ gəlir: ağ, südlü və tünd. Bu şokolad növlərinin hər biri tərkib hissəsi və qida dəyəri baxımından bir-birindən fərqlənir. Buna görə də onun bədəninizə təsiri də dəyişir. Şokoladın sağlamlığımıza müsbət təsirləri ümumiyyətlə tərkibindəki kakaonun miqdarı ilə əlaqələndirilir.
Tünd və südlü şokolad tez-tez elmi araşdırmalara daxil edilir, çünki tərkibində kakao qatı maddələr var. Kakao flavonoidlər adlanan güclü antioksidantlarla doludur və bu birləşmələrin xüsusilə ürək sağlamlığı üçün faydalı olduğu düşünülür. Ancaq ağ şokoladın bu baxımdan arxa planda qaldığını deyə bilərik, çünki tərkibində kakao qatıları deyil, yalnız kakao yağı var. Bəs şokoladı balanslaşdırılmış dietanın bir hissəsi hesab etmək olarmı? Əlbəttə! Bununla belə, şokoladın sağlamlığınıza hansı təsirləri ola biləcəyini bilmək vacibdir. Son araşdırmalarda bu mövzuda çox maraqlı məlumatlar təqdim edilib. Hər gün şokolad yesəniz bədəninizə nə olar? Birlikdə nəzər salaq:
Şokalad normasında yeyildikdə ürək sağlamlığını dəstəkləyə bilər
Tünd və südlü şokolad ürək sağlamlığına müsbət təsir göstərə bilər. Tünd şokolad flavonoidlərlə zəngindir. Bu flavonoidlər ürək-damar sağlamlığına faydalı olan antioksidanlardır. Bəzi tədqiqatlar göstərir ki, müntəzəm olaraq az miqdarda tünd şokolad istehlak etmək qan təzyiqi və xolesterol səviyyəsini yaxşılaşdıra bilər. 2018-ci ildə "Reviews in Cardiovascular Medicine" jurnalında dərc edilən bir araşdırma hər iki gündə bir orta miqdarda tünd şokolad istehlakının lipid səviyyələrini tənzimlədiyini ortaya çıxarıb.
Dəmir çatışmazlığına xeyirlidir
Dəmir çatışmazlığı xüsusilə qadınlar arasında ümumi bir problemdir. Tünd şokolad isə bu problemin dadlı həllidir deyə bilərik. 50 qram tünd şokoladda təxminən 6 mq dəmir var ki, bu da gündəlik dəmir ehtiyacınızın əhəmiyyətli hissəsini ödəyə bilər. Dəmirin udulmasını artırmaq üçün C vitamini ilə zəngin meyvələrlə tünd şokolad istehlak etmək daha yaxşıdır. Digər tərəfdən, südlü şokoladda daha az dəmir var, ona görə də dəmir üçün ən yaxşı seçim tünd şokoladdır.
Beyin funksiyalarını dəstəkləyir
Tünd şokolad beynin koqnitiv funksiyalarını yaxşılaşdıra bilər. 2019-cu ildə "Nutrients" jurnalında dərc edilən bir araşdırma 30 gün ərzində müntəzəm olaraq tünd şokolad istehlak edənlərdə koqnitiv funksiyaların yaxşılaşdığını göstərdi. Tədqiqatçılar bu təsiri şokoladın tərkibindəki teobromin və kofeinə bənzər komponentlərlə əlaqələndirirlər.
Pis xolesterol riskini artıra bilər
Şokoladın bəzi sağlamlıq faydaları olsa da, xüsusilə ağ və südlü şokoladın tərkibindəki yüksək miqdarda doymuş yağ və şəkər ürək sağlamlığı üçün risk yarada bilər. Doymuş yağ və şəkərin həddindən artıq istehlakı yüksək xolesterol və ürək-damar xəstəlikləri riskini artıra bilər. Buna görə də şokoladı həddindən artıq istehlak etməmək vacibdir.
Tərkibində ağır metallar ola bilər
Tünd şokolad bəzi mənfi təsirlərə də səbəb ola bilər. "Consumer Reports" tərəfindən 2022-ci ildə aparılan bir araşdırma bəzi tünd şokolad markalarının istehsal etdiyi şokaladların tərkibində qurğuşun və kadmium kimi zərərli metalların ola biləcəyini ortaya çıxardı. Bu metallar uzun müddət istehlak edildikdə sağlamlıq problemlərinə səbəb ola bilər. Ona görə də müntəzəm olaraq tünd şokolad istehlak edərkən diqqətli olmaqda fayda var.
Bizi sosial şəbəkələrdən izləyin!!
