Müəllif:Ayşən İmanova/Banco.az
Ukrayna Dünya Bankı ilə təxminən 600 milyon dollar dəyərində müqavilələr imzalayıb ki, bu da yeni maliyyə dəstəyi proqramı çərçivəsində ayrılacaq.
Banco.az xəbər verir ki, bu barədə Ukrayna mətbuatı ölkənin baş naziri Denis Şmıqalın “Teleqram” kanalına istinadən məlumat yayıb.
Baş nazirin sözlərinə görə, proqramın başlanması barədə apreldə Vaşinqtonda keçirilmiş “Spreing Meetings” görüşləri zamanı razılaşma əldə olunub.
Bu gün isə Ukraynanın Maliyyə və İqtisadiyyat nazirlikləri Dünya Bankı ilə müvafiq sazişləri imzalayıblar.
Söhbət kiçik və orta biznesin dəstəklənməsi, “yaşıl” keçid, biznes mühitinin yaxşılaşdırılması, rəqəmsallaşma və yeni bazarlara çıxışın asanlaşdırılması məqsədi daşıyan yeni “Dayanıqlı, İnklüziv və Ekoloji Dayanıqlı Sahibkarlıq” (RISE) layihəsindən gedir.
Qeyd olunur ki, layihə 2027-ci ilə qədər nəzərdə tutulub və proqramın ümumi planlaşdırılan məbləği 1 milyard dollardan çoxdur.
