Müəllif: Tamara Mustafayeva, Banco.az
Avropa İttifaqı (Aİ) ölkələrində ilk yarımildə ümumi elektrik enerjisi istehsalının dörddə üçü bərpa olunan və aşağı karbonlu enerji mənbələri hesabına təmin edilib.
Banco.az xəbər verir ki, Avropanın enerji sektorunu təmsil edən və elektrik enerjisinin istehsalı, paylanması və təchizatı sahəsində fəaliyyət göstərən 3500-dən çox təşkilatı birləşdirən Brüsseldə yerləşən “Eurelectric” şirkəti Aİ-nin elektrik enerjisi istehsalına dair birinci yarımil məlumatlarını dərc edib.
Məlumatlar göstərir ki, Aİ ölkələrinin indiyə qədərki ən “yaşıl” elektrik enerjisi istehsalı bu dövrdə baş tutub, təmiz mənbələrdən elektrik enerjisi istehsalı rekord vurub.
Məlumatlara görə, 2024-cü ilin birinci yarısında Aİ-də istehsal olunan elektrik enerjisinin 74 faizi bərpa olunan və aşağı karbonlu enerji mənbələri hesabına təmin edilib. Bu dövrdə günəş və külək kimi bərpa olunan mənbələr Avropada bütün elektrik enerjisi istehsalının 50 faizindən çoxunu təşkil edib.
Nüvə enerjisindən elektrik enerjisi istehsalının payı 24 faizə çatıb. Elektrik enerjisinin istehsalında təbii qazın payı təxminən 13 faiz, kömürün payı isə 9 faiz təşkil edib.
Xatırladaq ki, Aİ-nin elektrik enerjisi istehsalında bərpa olunan və aşağı karbonlu enerji mənbələrinin payı 2023-cü ildə isə 68 faiz hesablanmışdı.
Bizi sosial şəbəkələrdən izləyin!!
