"Unicapital İnvestisiya Şirkəti" ASC-nin Portfel idarəçiliyi şöbəsi bazarların həftəlik analitikasını təqdim edir:
Daxili Bazar
• 29 mart tarixində AR Mərkəzi Bankı faiz dəhlizinin parametrləri ilə bağlı iclasında uçot dərəcəsini və həmçinin, dəhlizin aşağı və yuxarı hədlərini 0.25% artıraraq uçot dərəcəsini 8.75%-ə, faiz dəhlizinin aşağı həddini 7%-ə, faiz dəhlizinin yuxarı həddini isə 9.75%-ə qaldırmışdır. Mərkəzi Bank bildirir ki, bu qərarı verərkən daxili və xarici mühitdə qiymət səviyyəsinə təsir göstərən amillərin dinamikası əsas götürülmüşdür. Faiz dəhlizinin parametrlərinə dair növbəti qərar 2023-cü ilin may ayının 3-də açıqlanacaqdır.
• 4 aprel tarixində AR Maliyyə Nazirliyinin 50 milyon AZN həcmində 1 illik istiqrazlarının yerləşdirilməsi üzrə hərrac keçiriləcəkdir. Ötən ay 1 illik istiqrazların hərracında tələb təklifi təxminən 4 dəfəyədək üstələmiş, orta ölçülmüş gəlirlilik 6.52% olmuşdur.
• "Fitch Ratings" beynəlxalq reytinq agentliyi Azərbaycanın xarici valyutada uzunmüddətli emitent defolt reytinqini (EDR) müsbət proqnozla "BB+" səviyyəsində təsdiqləyib. Agentliyin məlumatında bildirilir ki, bu reytinq Azərbaycanın çox güclü xarici balansı, müvafiq ölkələr qrupunda ən aşağı dövlət borcu və suveren fond aktivlərindən maliyyələşmə çevikliyi ilə dəstəklənir. Suveren fond aktivlərinin 2023-2024-cü illərdə də artaraq ÜDM-in 68%-i həcminə çatacağı proqnoz edilir. Agentlik 2023-2024-cü illərdə Azərbaycanda ÜDM-in ildə orta hesabla 2,1% artacağını və 2023-cü ildə Azərbaycanda orta illik inflyasiyanın 10,3%-dək, 2024-cü ildə 7,3%-dək azalacağını proqnozlaşdırır
Qlobal bazar
• Ötən həftə ABŞ-da 2022-ci ilin son rübü üçün (illik əsasa gətirilmiş) ÜDM artımı məlumatı açıqlandı. İqtisadi göstərici analitiklərin gözləntilərindən (2.7%) bir qədər aşağı, 2.6% oldu.
• Bu həftə ABŞ-da mart ayının işsizlik göstəricisi, o cümlədən, qeyri-kənd təsərrüfatı sahələrində iş yerləri sayında dəyişiklik məlumatı açıqlanacaq. Analitiklər işsizliyin dəyişməyərək 3.6% qalacağını, digər göstəricinin isə azalaraq 311k-dan 240k-a düşəcəyini proqnoz edirlər.
• Türkiyədə mart ayının inflyasiya məlumatı, istehlak qiymətləri indeksi açıqlanmışdır. İnflyasiya azalaraq 55.18%-dən 50.51%-ə düşmüşdür.
• Bəzi OPEC+ ölkələri may ayından gündəlik neft hasilatını könüllü azaldacaqlarını açıqlayıblar. Bu açıqlamalardan sonra neft qiymətlərində kəskin artım müşahidə olunub və dollar neft qiymətləri artımlarının inflyasiyanı artıracağı və FED-in növbəti iclaslarında faiz artımı edəcəyi ehtimalının artması səbəbilə möhkəmlənib.
Bizi sosial şəbəkələrdən izləyin!!
