Müəllif:Ayşən İmanova/Banco.az
Böyük Britaniyanın ən böyük bankı HSBC Rusiya və Belarusdan ödənişləri qəbul etməyi dayandıracağını açıqlayıb.
Banco.az xəbər verir ki, bu barədə bankın saytında yerləşdirilən məlumatda deyilir.
Bildirilir ki, yeni tədbirlərə görə bu ölkələrdən ödənişlər rədd edilə və vəsaitlər geri qaytarıla bilər.
"Əgər bu ölkələrdən ödəniş etmək və ya almaq lazımdırsa, alternativ tədbirlər görməlisiniz", - HSBC-nin bəyanatında deyilir.
Bank bu qərarın səbəbini açıqlamayıb və müştərilərdən yaranan narahatlığa görə üzr istəyib.
Qeyd edək ki, HSBC aktivlərinə və bazar kapitallaşmasına görə ən böyük Britaniya bankıdır. 2022-ci ilin iyul ayında o, Rusiya Federasiyasındakı biznesini "Expobank"a satmaq üçün müqavilə imzalayıb. Bundan sonra bank qrupu nəhayət Rusiyanı tərk etmək niyyətində olub. Prezident Vladimir Putin bu ilin fevralında sazişi təsdiqləyib və bank mayın sonunda bağlanıb.
