Müəllif: Tamara Mustafayeva, Banco.az
Xarici investorlar dünyanın ikinci ən böyük iqtisadiyyatı olan Çindən aprel-iyun dövründə rekord kapital çıxışı həyata keçiriblər.
Banco.az xəbər verir ki, Çin Milli Xarici Valyuta Administrasiyasının (SAFE) məlumatlarına görə, ikinci rübdə Çinin ödəniş balansındakı birbaşa investisiya öhdəlikləri təxminən 15 milyard dollar azalıb.
Birbaşa investisiyalar ilk 6 ayda təxminən 5 milyard dollar azalıb.
Əgər azalma ilin qalan hissəsində də davam edərsə, bu, məlumatların qeydə alınmağa başlandığı 1990-cı ildən bəri ilk illik xalis kapital çıxışı olacaq.
Qeyd edək ki, 2021-ci ildə rekord həddə - 344 milyard dollara yüksələn xarici investisiyalar son illərdə azalıb. İqtisadiyyatdakı yavaşlama və artan geosiyasi gərginlik bəzi şirkətlərin mövqelərini azaltmasına səbəb olub. Ölkədə elektrik avtomobillərinə sürətli keçid də bəzi avtomobil şirkətlərini qəfil yaxalayıb və şirkətlər investisiyalarını azaltmağa qərar veriblər.
Çin Ticarət Nazirliyinin daha əvvəl açıqladığı məlumatlar ilin birinci yarısında yeni birbaşa investisiyaların pandemiyanın başladığı 2020-ci ildən bəri ən aşağı səviyyəyə düşdüyünü göstərib.
Bizi sosial şəbəkələrdən izləyin!!
