“Bank Technique” ASC və “Yeni Hayat” Şirkətlər Qrupu birgə ipoteka layihəsinə start verdilər. Layihənin başlanması barədə bu gün birgə təşkil edilmiş mətbuat konfransında elan edilib.
Yeni ipoteka layihəsinin şərtlərinə əsasən, “Yeni Hayat” Şirkətlər Qrupuna aid “Park Azure” yaşayış kompleksindəki bütün mənzilləri 20% ilkin ödəniş etməklə, 10 il müddətinə və illik 8 faiz dərəcəsi ilə əldə etmək mümkündür. Maksimum, 1 saat ərzində aparılan sadələşdirilmiş sənədləşmə isə rahat şəkildə ipoteka kreditini rəsmləşdirməyə imkan yaradır.
Paytaxt infrastrukturunun ən uğurlu hissələrinin birində, Afiyəddin Cəlilov küçəsi 27A ünvanında inşasına başlanılan “Park Azure” yaşayış kompleksi 2, 3, 4 və 5 otaqlı 585 mənzildən ibarətdir. Geniş həyəti, 2000 avtomobilə qədər yerləşdirmə imkanı olan müasir avtodayanacağı, hipermarketi, kinoteatrı, SPA və Fitness mərkəzi, uşaq bağçası və Avropanın ən böyük qapalı əyləncə mərkəzi “Megafun”a keçid ilə “Park Azure” lüks həyatın bütün atributlarını orta sinif üçün əlçatan edir.
“Bank Technique”ASC-nin Müştəri Xidməti Departamentinin direktoru Kamran Axundov yeni layihəni şərh edərkən bildirib ki, birgə layihənin məqsədi geniş əhali kütləsinin mənzillərə olan tələbatını ödəməkdir. “Əhalinin orta sinif təbəqəsi üçün nəzərdə tutulan bu birgə kredit layihəsi, sərfəli şərtlərlə yanaşı, dövlətin maliyyələşdirdiyi ipoteka proqramında olduğu kimi, vətəndaşlar tərəfindən illik 8% dərəcəsi ilə ödənilməklə , yerindəcə sənədləşmə ilə fərqlənir. Bir müştəri 45-60 dəqiqə ərzində rəsmləşdiriləcək kredit hesabına mənzil sahibi ola biləcək”, - deyə Kamran Axundov bildirib.
Məlumat üçün:
1994-cü ildən Azərbaycanın maliyyə xidmətləri bazarında fəaliyyətə başlayan “Bank Technique” Açıq Səhmdar Cəmiyyəti (ASC), 2012-ci ilin sentyabr ayında həyata keçirdiyi uğurlu rebrendinq nəticəsində, innovativ və qabaqcıl bank imicini yarada bilib. Özəl bank sektorunda uğurlu və sürətli inkişaf mexanizmi ilə fərqlənən “Bank Technique” ASC, Azərbaycanda geniş spektrdə bank və maliyyə xidmətləri göstərir.
Hazırda “Bank Technique”in 32 filial və 8 şöbəsi Bakı, Gəncə, Sumqayıt, Abşeron, Mingəçevir, Quba, Qəbələ, Beyləqan, Biləsuvar, Neftçala, Zaqatala, Cəlilabad, Ağstafa, Lənkəran, Xaçmaz, Balakən və Tərtərdə müştərilərin xidmətindədir.
Daha ətraflı məlumat üçün www.banktechnique.az saytına baxa bilərsiniz.
