Müəllif: Tamara Mustafayeva, Banco.az
"Ernst & Young" (EY) şirkətinin hesabatına əsasən, bu il mülayim, gələn il isə cüzi artım gözlənilir.
Banco.az xəbər verir ki, "Ernst & Young" (EY) şirkəti "Qlobal İqtisadi Perspektivlər 2024" hesabatını dərc edib.
Hesabat göstərir ki, faiz dərəcələrinin əhəmiyyətli dərəcədə artmasına baxmayaraq, qlobal iqtisadiyyat diqqətəlayiq dayanıqlıq nümayiş etdirib.
Bildirilənə görə, ümumi daxili məhsulun (ÜDM) 2024-cü ildə 3,1 faizlə orta dərəcədə artacağı, 2025-ci ildə isə 3,2 faizə qədər artacağı proqnozlaşdırılır. İnkişaf etmiş iqtisadiyyatlarda 2023-cü ildə qeydə alınan 1,5 faiz artım tempinin 2024-cü ildə 1,6 faiz, 2025-ci ildə isə 1,8 faiz olacağı gözlənilir. İnkişaf etməkdə olan bazarlarda isə 2023-cü ildə 4,2 faizlik artımın 2024 və 2025-ci illərdə 4,1 faizə enəcəyi təxmin edilir.
İnkişaf etmiş iqtisadiyyatlarda, xüsusən Avropa və Böyük Britaniyada artımın əsas səbəbləri daha sərbəst pul siyasətinin tədricən həyata keçirilməsi və inflyasiyaya uyğunlaşdırılmış gəlir artımının bərpası olduğu düşünülür.
Latın Amerikası və Yaxın Şərq və Şimali Afrika (MENA) regionlarında 2025-ci ilə qədər cüzi artım sürətlənməsi proqnozlaşdırılır.
Qlobal inflyasiyanın 2023-cü ildə 6,2 faizə yüksəlməsindən sonra 2024-cü ildə 4,6 faizə, 2025-ci ildə isə 3,5 faizə qədər soyuması gözlənilir.
Bizi sosial şəbəkələrdən izləyin!!
