Müəllif: Tamara Mustafayeva, Banco.az
Türkiyə, Çin və Birləşmiş Ərəb Əmirliklərində banklar ABŞ-ın sanksiyalarına görə ehtiyatlı davranarkən, Rusiya neft ödənişlərini toplamaqda çətinlik çəkir.
Banco.az xəbər verir ki, bu barədə “Reuters” agentliyi məlumat yayıb.
Türkiyə, Çin və Birləşmiş Ərəb Əmirliklərində (BƏƏ) fəaliyyət göstərən banklar ABŞ-ın ikinci dərəcəli sanksiyaları səbəbindən əməliyyatlarda daha ehtiyatlı davranmağa başladığından Rusiya neft şirkətlərinə xam neft və yanacaq ödənişləri bir neçə aya qədər gecikmələrə məruz qala bilir.
“Reuters”ə açıqlama verən səkkiz bank və ticarət mənbəsinin verdiyi məlumata görə, Türkiyə, Çin və BƏƏ-dəki bəzi banklar son həftələrdə sanksiyalara uyğunluq tələblərini artırıb və bu, Moskvaya pul köçürmələrinin gecikməsinə və ya hətta rədd edilməsinə səbəb olub.
Mənbələrdən ikisi bildirib ki, BƏƏ-də First Abu Dhabi Bank (FAB) və Dubai Islamic Bank (DIB) Rusiya mallarının ticarəti ilə bağlı bəzi hesabları dayandırıb. Mənbələrdən dördü isə bildirib ki, Türkiyənin Ziraat Bankı və Vakıfbank, BƏƏ-nin Mashreq bankı və Çin bankları ICBC və Bank of China hələ də ödənişləri emal edir, lakin bu əməliyyatların tamamlanması həftələr və ya aylar çəkir.
Kremlin sözçüsü Dmitri Peskov Çində bankların ödənişləri ləngitməsi xəbəri ilə bağlı verilən suala ödənişlərlə bağlı problemlərin olduğunu bildirmişdi.
Bizi sosial şəbəkələrdən izləyin!!
