Müəllif:Gülbəniz Hüseynli/Banco.az

İdarəetmədə tez-tez dəyişikliklərin edilməsi şirkətin performansına mənfi təsir göstərir.

Banco.az-ın məlumatına görə, bu barədə “ScienceGate”in araşdırmasında bildirilir.

Araşdırmaçı ekspertlər hesab edir ki, belə dəyişikliklər şirkətin gəlirliyində və ümumi fəaliyyət göstəricilərində əhəmiyyətli zəifləşmələrə səbəb ola bilər.

 Yeni rəhbərlik gəldikdə, öncəki menecerlərin qurduğu vacib əlaqələrin itirilməsi və mövcud komandanın adaptasiya olunması zaman alır. Bu da, xüsusilə strateji biliklərin və mövcud iş mühitinə uyğunlaşmanın itirilməsi ilə nəticələnir.

Tədqiqatlar Çində şirkətlər üzərində aparılmış araşdırmalar zamanı göstərir ki, rəhbər dəyişikliyi həm aktivlərin gəlirliliyi (ROA), həm də kapitalın gəlirliliyi (ROE) göstəricilərini əhəmiyyətli dərəcədə aşağı sala bilər. Nəticələrə görə, bir il ərzində bir neçə CEO dəyişən şirkətlərin maliyyə göstəriciləri daha da zəifləyir. Belə dəyişikliklər daha çox təşkilati qeyri-müəyyənlik və resursların düzgün idarə edilməməsi riskini artırır, nəticədə strateji hədəflərə çatmaqda gecikmələr yaranır.

Bununla yanaşı, tədqiqatlar göstərir ki, şirkətin yaşı və idarə heyətinin ölçüsü də bu prosesdə mühüm rol oynayır: təcrübəli komandalar tez-tez dəyişikliklərə daha dayanıqlı olurlar və rəhbərlik dəyişsə belə şirkətin işlərini sabit saxlaya bilirlər. Ancaq ümumi tendensiya göstərir ki, tez-tez baş verən rəhbər dəyişikliyi, xüsusən də böhran vəziyyətlərində, şirkət üçün ciddi maliyyə problemləri yarada və performansı aşağı sala bilər.