Noyabrın 2-də Bakı Biznes Mərkəzində Azərbaycanda fəaliyyət göstərən "Women Bankers Club"un  (Qadın Bankirlər Klubunun) növbəti tədbiri keçirilib. Tədbiri giriş sözləri ilə açan klubun təsisçisi Anjela Ramazanova klubun fəaliyyəti haqda qısaca məlumat verdi. Daha sonra “M Group Production”-ın rəhbəri, xalq artisti Murad Dadaşov qonaqları salamlayaraq qadının cəmiyyətdəki rolundan söz açdı: “Bu gün buraya gəlməzdən əvvəl çox düşündüm. Qadın doğrudan da güclü qüvvədir. Azərbaycan xanımları isə fövqəladə güclüdür. Onlar öz zəhməti, alın təri ilə ortaya nə isə çıxarırsa bu yalnız alqışlana bilər. Bu illər ərzində həyatımda olan bütün xanımlara öz təşəkkürümü bildirirəm. Hesab edirəm ki, cəmiyyətimizdə qadına olan münasibəti cəmiyyət dəyişməlidir. Bizim cəmiyyətdə qadını təhqir etməkdən çəkinmirlər, amma sevgi etirafı etməkdən çəkinirik. Bax bu stereotiplər aradan qaldırılmalıdır. Mənim ən böyük tənqidçim həmişə anam olub. Ən böyük konsertlərdən sonra həmişə onun fikirlərini soruşmuşam. Biz hər şeyi xanımlardan öyrənirik”.

Daha sonra əməkdar artist tədbir iştirakçılarının suallarını cavablandırdı.

Qeyd edək ki, “Women Bankers Club” Azərbaycanda yeganə Qadın Bankirləri Klubudur. Klubun məqsədi Bank sektorunda çalışan Qadınları birləşdirib, uğurlu ünsiyyət platforması yaradaraq vahid ideologiya ətrafında faydalı fikir və peşəkarlıq mübadiləsinin aparılması, yeni tanışlıqların, banklararası münasibətlərin qurulması və möhkəmləndirilməsi, bir-birinə işgüzar dəstəyin təmin edilməsidir.