Müəllif: Tamara Mustafayeva, Banco.az
“Tesla” 2 milyard dollarlıq zavod investisiyası üçün Hindistanla razılıq əldə etmək üzrədir.
Banco.az xəbər verir ki, Hindistan ABŞ-ın elektromobil nəhəngi “Tesla” ilə markanın avtomobillərini gələn ildən etibarən ölkəyə göndərməyə və iki il ərzində burada fabrik inşa etməyə imkan verəcək sövdələşməyə yaxın görünür.
Razılaşmanın yanvarda keçiriləcək Canlı Qucarat Qlobal Sammitində elan edilməsi planlaşdırılır.
Mövzuya yaxın mənbələrdən biri Hindistanın baş naziri Narendra Modinin məmləkəti olan Qucarat, Maharaştra və Tamil Nadu əyalətlərinin elektriklə işləyən avtomobillər və ixracat üçün yaxşı qurulmuş ekosistemə malik olduqlarına görə qiymətləndirildiyini bildirib.
Bildirilənə görə, “Tesla” Hindistandakı fabrik sərmayəsi üçün minimum 2 milyard dollar investisiya etməyi planlaşdırarkən, ölkədən avtomobil hissələri alışını 15 milyard dollara qədər artıra bilər.
Mənbələrdən biri həmçinin bildirib ki, ABŞ avtomobil istehsalçısı xərcləri azaltmaq üçün bəzi akkumulyatorları Hindistanda istehsal etməyə çalışacaq.
Xatırladaq ki, “Tesla” rəhbəri İlon Mask iyun ayında “Tesla”nın Hindistana "əhəmiyyətli bir sərmayə" qoymağı planlaşdırdığını və 2024-cü ildə bu ölkəyə səfər etməyi düşündüyünü söyləmişdi.
Bizi sosial şəbəkələrdən izləyin!!
