30 sentyabr 2015-ci il tarixində Azərbaycan Respublikasının Qiymətli Kağızlar üzrə Dövlət Komitəsinin (QKDK) 2016-2018-ci illər üzrə strateji planlarının hazırlanmasına həsr olunmuş Kollegiya iclası keçirilmişdir.   

İclası giriş sözü ilə açan QKDK-nın sədri Rüfət Aslanlı 2013-2015-ci illəri əhatə edən Strateji Planlama müddətinin sona çatmaq üzrə olduğunu və növbəti üç illik müddət üçün komitənin inkişaf strategiyasının müəyyənləşdirilməsinin zəruriliyini tədbir iştirakçılarının diqqətinə çatdırdı. Sədr makroiqtisadiyyat və qlobal maliyyə bazarlarında baş verən hadisələr barədə danışaraq enerji daşıyıcılarının qiymətinin kəskin azaldığını, inkişaf etmiş ölkələrdə deflyasiya meyllərinin artdığını, inkişaf etməkdə olan ölkələrdə isə devalvasiyanın gücləndiyini və idxal imkanlarının azaldığını bildirdi. Qeyd olunanlar fonunda maliyyə institutları tərəfindən son dövrlər dünya iqtisadiyyatının artım proqnozlarının davamlı olaraq azaldıldığı diqqətə çatdırıldı.

R.Aslanlı ölkə başçısı cənab İlham Əliyevin ciddi düşünülmüş siyasəti nəticəsində son dekada ölkənin ümumdaxili məhsulun 3 dəfə, investisiya qoyuluşlarının 3.6 dəfə, əhalinin gəlirlərinin 6.5 dəfə, əmanətlərin 13.8 dəfə artdığını qeyd etdi. Dünyada müşahidə edilən neqativ tendensiyalar fonunda Azərbaycan iqtisadiyyatı və maliyyə sektoru üçün yeni çağırışların formalaşdığını diqqətə çatdırdı.   Sədr QKDK qarşısında duran missiya əsas vəzifələr sırasında qeyri-neft sektorunu ucuz, davamlı və rəqabətli maliyyə resurslarına çıxış ilə təmin edilməsi, hökumətin iqtisadi diversifikasiya siyasətinin dəstəklənməsi və yüksək kompetensiyalı bazar institutlarının formalaşdırılması məsələləri vurğuladı.

Kollegiyanın yekununda struktur bölmələrin mandatlarına uyğun olaraq 2016-2018-ci illər üzrə strateji fəaliyyət planlarının hazırlanması istiqamətində müvafiq qərarlar qəbul edildi.