“Azərbaycan Beynəlxalq Bankı” müştərilərə verilmiş kreditlərin tərkibi barədə bəzi məlumatları açıqlayıb.

30 Sentyabr 2019-cu il tarixində “Azərbaycan Beynəlxalq Bankı”nın cəmi kredit portfeli (müştərilərə verilmiş kreditlər) 2 milyard 247 milyon 125 min manat təşkil edib. Ötən ilin sonu ilə müqayisədə 9 ay ərzində kredit portfeli 324 milyon 93 min manat artıb. Bankın kredit portfeli 31 Dekabr 2018-ci il tarixində 1 milyard 923 milyon 33 min manat idi.

Müştərilərə verilmiş kreditlərin 1 milyard 186 milyon 304 min manatını biznes kreditləri, 463 milyon 513 min manatını istehlak kreditləri, 597 milyon 308 min manatını daşınmaz əmlak kreditləri (əsasən ipoteka kreditləri) təşkil edib.

Ötən ilin sonu ilə müqayisədə biznes kreditləri 160 milyon 532 min manat, istehlak kreditləri 141 milyon 531 min manat, daşınmaz əmlak kreditləri isə 22 milyon 30 min manat artıb.

ARTAN KREDİTLƏR QAZANCI DA ARTIRIB

Müştərilərə verilən kreditlərin artması bankın faiz gəlirlərinin artmasında əks olunub. Ötən ilin 9 ayında “Azərbaycan Beynəlxalq Bankı”nın faiz gəlirləri 308 milyon 866 min manat ikən, bu ilin eyni dövründə 334 milyon 194 min manat təşkil edib (8,2% artım). O cümlədən, müştərilərə verilmiş kreditlərdən əldə edilən faiz gəlirləri isə 127 milyon 861 min manatdan 144 milyon 282 min manata qalxıb (12,8% artım).

"Azərbaycan Beynəlxalq Bank" ASC 9 milyard 321 milyon 336 min manat cəmi aktivləri ilə Azərbaycanın ən böyük bankıdır.

Marja