Müəllif: Tamara Mustafayeva, Banco.az
Hər ilin dekabr ayını Milad və Yeni il filmləri ilə qarşılamaq çoxumuz üçün, məncə, artıq adət halına çevrilib. Çünki uşaqlıqdan bəri bu filmlər bizə yeni ilin gəlişini xəbər verir, yeni ümidlər, gözəl başlanğıclar müjdələyir. Ürəyimizi isidən, soyuq qış günlərinin boz ab-havasını parlaqlığı ilə rəngləndirən Yeni il filmləri tanımadığımız həyatların işığına toplaşmağımıza səbəb olur.
Siz də isti şokoladınızı, çayınızı və ya kofenizi götürün, əvvəlcə məqaləmizdəki filmlərlə tanış olun, sonra isə bəyəndiklərinizə tamaşa etməyə başlayın. Axı qarşıda hələ nağılvari bayram tətili var...
Banco.az həm yeni, həm də illər ərzində aktuallığını itirməmiş Milad və Yeni il filmlərindən ibarət builki siyahını təqdim edir.
The Claus Family (1,2)
Buraxılış ili: 2020
Ölkə: Belçika
Babasının qəfildən xəstələnməsi nəticəsində ailəsinin sehrli irsi ilə tanış olan Culs öyrənir ki, Milad ənənəsini məhv olmaqdan sadəcə o qurtara bilər. Bayrama nifrət edən bu gənc oğlan Milad ruhunun yox olmasına icazə verəcəkmi?
Qeyd edək ki, hadisələrin daha da maraqla davam etdiyi filmin ikinci hissəsinə də tamaşa etməyinizi tövsiyə edirik.
Christmas with the Kranks
Buraxılış ili: 2004
Ölkə: ABŞ
Qızları Blerin oxumaq üçün Peruya getməsindən sonra Lüter və Nora Krank cütlüyü həmin il Milad bayramını qeyd etməmək qərarına gəlirlər. Qarlı, soyuq qış günlərindən uzaqlaşıb kruiz səfərinə çıxmağa hazırlaşan cütlüyün planı qızlarının bayram ziyarəti xəbəri ilə suya düşür. Blerə ənənəvi Milad şənliyini vəd edən ata-anasının bu vədlərinə sadiq qalmaq üçün isə cəmi bir neçə saatı var. Bəs Milad öz sehrli möcüzəsini göstərəcəkmi?
The Noel Diary
Buraxılış ili: 2022
Ölkə: ABŞ
Əsərləri böyük tirajla satılan, tanınmış roman müəllifi Castin Milad ərəfəsi bir vaxtlar ailəsi ilə birlikdə yaşadığı evə qayıtmalı olur. Görəsən keçmişin qatı açılmamış sirləri bugünün həqiqətini dəyişə biləcəkmi?
A Christmas Miracle for Daisy
Buraxılış ili: 2021
Ölkə: ABŞ
İnteryer dizayneri Uitni üçün keçmiş sevgilisinin qızı ilə birlikdə yaşayacağı evi dekorasiya etmək əsl Milad süprizi olur. Balaca qızcığazın isə bu bayramdan yeganə diləyi var. Maraqlıdır, şaxta baba bu diləyi yerinə gətirməyə qadirdirmi?
Daddy's Home 2
Buraxılış ili: 2017
Ölkə: ABŞ
Dasti və Bred uşaqlarına ən mükəmməl Milad bayramını yaşatmaq istəyirlər. Ancaq qəhrəmanlarımızın ataları eyni anda onları ziyarət etmək qərarına gəldikdə bütün planlar dəyişməli olur. Doyunca gülməyə və Milad ruhunun bir-birindən yerlə-göy qədər fərqli xarakterə sahib bu dörd atanın həyatında nələri dəyişəcəyinə şahid olmağa hazır olun.
Falling for Christmas
Buraxılış ili: 2022
Ölkə: ABŞ
Sierra otel şəbəkələri olan milyonçu atanın yeganə qızıdır. Bir gün xizək qəzasında yaddaşını itirən gənc qadın bu hadisə nəticəsində həyatını dəyişdirəcək insanlarla və onların Milad ənənəsi ilə tanış olur.
Christmas Time Is Here
Buraxılış ili: 2021
Ölkə: ABŞ
Nia atasının ailə yadigarı mehmanxanasını satın almağa çalışan və eyni zamanda karyerasının ən böyük müştərisi olan Culiana gözləmədiyi halda aşiq olduğu zaman romantika, karyera və ailə əlaqələri toqquşur. Təbii ki, bütün çətinliklərin öhdəsindən gəlmək üçün onların Milad sehrinə inanmağa ehtiyacları var.
The Family Stone
Buraxılış ili: 2005
Ölkə: ABŞ
Ənənəçi və inadkar iş qadını Meredit Milad ərəfəsi sevgilisi ilə birlikdə oğlanın qeyri-adi və açıq fikirli ailəsini ziyarətə gedir. Belə bir mühitdə özünü artıq hiss edən gənc qadın bu vaxta qədər formalaşdırdığı qayda-qanunları dəyişdirməyə hazırdırmı?
Christmas on Ice
Buraxılış ili: 2020
Ölkə: ABŞ
Keçmiş fiqurlu konkisürən və keçmiş xokkey oyunçusu bələdiyyə başçısının yerli konkisürmə meydançasını bağlamasına mane olmaq üçün birlikdə işləməli olurlar. Miladın isti nəfəsi buz meydançasından da soyuq ürəklərin buzunu açmağa kifayət edəcəkmi?
Noel
Buraxılış ili: 2004
Ölkə: ABŞ
Nyu-Yorkda Milad bayramına lap az qalıb. Rouz altsheymer diaqnozu qoyulan yaşlı anası ilə xəstəxanada qalmalıdır. Nina nişanlısı Maykın qısqanclıqları səbəbilə qarşıdan gələn evliliyini ləğv etməyi düşünür, Maykı isə onun mərhum həyat yoldaşının reenkarnasiyası olduğuna inanan ofisiant Arti izləyir. Bu minvalda Culs adlı bir gənc özünün ən xoşbəxt Milad xatirəsini yenidən yaratmaq istəyir.
Müxtəlif həyatları bir-birinə bağlayan, sevgi, ailə və bağışlanma haqqında təsirli mesajlar ötürən bu cəlbedici Milad dramına heyran olacaqsınız.
Bonus
Scrooge: A Christmas Carol
Buraxılış ili: 2022
Ölkə: Birləşmiş Krallıq
Siyahının bonus filmi isə ingilis ədəbiyyatının ən məşhur yazıçılarından biri Çarlz Dikkensin eyniadlı romanının motivləri əsasında hazırlanmış animasiyadır. Dilimizə “Milad Nəğməsi” kimi tərcümə olunan bu əsər Ebenecer Skrucun başına gələn hadisələrdən bəhs edir. Belə ki, soyuq Milad ərəfəsi eqoist, xəsis iş adamı Skrucun keçmişi ilə üzləşmək və gələcəyi dəyişdirmək üçün təkcə bir gecəsi var.
Bizi sosial şəbəkələrdən izləyin!!
