Tamara Mustafayeva, Banco.az
5S metodu həyatınızı və ya işinizi daha yaxşı hala gətirmək üçün sizə 5 əsas prinsip təqdim edir. Bu prinsiplərin hər biri nizamlılıq və təmizkarlığı əsas götürür. Son dövlərdə olduqca populyarlaşan bu metod əksər şirkətlər tərəfindən də məhsuldarlığı artırmaq üçün istifadə edilir.
Qeyd edək ki, 2020-ci ilin ən dəyərli avtomobil markası seçilən Toyota da bu metoda müraciət edən şirkətlərdən biridir. Şirkət sözügedən metoda 1960-cı illərdə iş mühitinin daha nizamlı, təmiz və aktiv hala gətirilməsi üçün müraciət etmişdi.
5S metodu yaponların tənbəlliyə qarşı təqdim etdikləri başqa bir üsul olan Kayzen metodu ilə birlikdə də istifadə edilir. Kayzen metodu haqqında ətraflı məlumat əldə etmək istəyirsinizsə, aşağıdakı məqaləmizi oxuya bilərsiniz.
Həyatınızı dəyişəcək 5 fəlsəfi düşüncə
İndi isə gəlin, sözügedən 5S metodu ilə yaxından tanış olaq.
1) Seiri – Təsnifatlaşdır
Evdə, ofisdə, iş masasında həddindən artıq yer tutmasına baxmayaraq, çox da ehtiyacınız olmayan əşyaları götürün. Hansı əşyalardan söhbət getdiyini müəyyənləşdirmək üçün isə bütün əşyaları nəzərdən keçirərək onları axırıncı dəfə nə zaman istifadə etdiyinizi düşünün. Hər hansı bir əşyadan bir ilə yaxındır ki, istifadə etmirsinizsə, bundan sonra da istifadə etməyəcəyinizə əmin ola bilərsiniz.
2) Seiton – Nizama sal
Əşyaları əvvəlcədən müəyyənləşdirdiyiniz ehtiyac sırasına uyğun yerləyə qoyun. Buradakı əsas məqsəd həmin əşyaları axtararkən itirdiyiniz vaxt və enerjini minimuma endirməklə məhsuldarlığı artırmaqdır.
3) Seiso – Təmizlə
İş və yaşayış mühitini mümkün olduğu qədər təmiz və səliqəli saxlamağa diqqət yetirin. Bununla da işləməyə həvəsiniz artacaq və daha məhsuldar nəticələr əldə edəcəksiniz. Həmçinin nizamsızlığın səbəb olduğu arzu edilməz qəzaların da qarşısı alınacaq.
4) Seiketsu – Müntəzəmliyə riayət et
Həyata keçirdiyimiz dəyişiklikləri müntəzəm olaraq təkrarlamalıyıq. Hədəfimiz öz standartlarımızdan geridə qalmamaq olmalıdır. Məsələn, iş yerində hər kəsin vəzifəsi və bundan qaynaqlanan tapşırıqların bitmə vaxtı əvvəlcədən müəyyənləşdirilməli və mümkün olduğu qədər bu standartlar pozulmamalıdır.
5) Shitsuke – İntizama əməl et
Davamlılığa nail olmağın əsas yolu intizamdır. Odur ki, iş yerlərində işçilərə verilən tapşırıqların yerinə yetirilməsinə müntəzəm olaraq nəzarət edilməlidir ki, zaman keçdikcə bu, işçilərin özündə bir vərdişə çevrilsin. İntizamlı olmaq üçün isə ilk növbədə bunu etməkdəki əsas məqsədinizin nə olduğunu müəyyən etməlisiniz.
Həmçinin oxu: 5 kitabdan mütləq öyrənməli olduğunuz – 5 həyat dərsi
Bizi sosial şəbəkələrdən izləyin!!
